هل اللغة المنطوقة (الكلام) مقياس معرفة؟
فبحسب ما أرى- وهذا راي شخصي- أن الكلام ممارسة مكتسبة في اخراج اصوات ذات دلالات، وتفرض كل كلمة معناها من ردود الفعل عند سماعها، فتبقى في ذاكرة المتلقي ويكررها عند طلب الشيء نفسه، ودون الدخول في تعريف أكاديمي وشروط القواعد.
الطيور وحيوانات البر والبحر لها أصواتها، والحشرات كذلك، وهي اصوات للتواصل بينها، في حالات الجوع والخوف والتزاوج والتحذير، وهي كائنات (غير عاقلة) بحسب التعريف البشري للعقل رغم أن قدرتها الفطرية في التعامل مع بيئتها أعلى بكثير من البشر (العاقل) وخاصة فن البقاء.
من هاي المقدمة اريد أشوف شنو موضوع عقدة العراقي مع اللغة، بحيث يعتبر اللي يتكلم لغة صوتية ثانية غير العربية وخاصة اللغة الأنگليزية قمة الذكاء البشري في الإدارة والتخطيط الاستراتيجي، لدرجة اللي يحچي أنگليزي عدنا هو شمس العارفين وبوصلة الخروج من نفق الجهل المظلم.
بس للعلم، طيب الذكر حاتم كاظم الهضم كان يعرف خمس لغات، بس هو مجرم، اللغة ما طورت عنده الحس الإنساني لدرجة التخطيط لخير الإنسان، بل صار يذبح بالطبر.
واللي طيح حظ العراق في 1991 طارق عزيز اللي يتقن اللغة الانگليزية، لأن جماعة الرفاق ما كان بيهم واحد يگعد أمام جيمس بيكر غير الرفيق طارق، اللي رفض يستلم الرسالة اللي كان بيها الخلاص، وترك ولدنا يصيرون فحم على طريق الموت على طريق البصرة.
وأي بقال لو بائع خضراوات في سوق القورية في كركوك قبل خمسين سنة، واللي ما شايف باب مدرسة بحياته كان يتكلم خمس لغات بسبب التنوع الثقافي في كركوك خاصة في منطقة القورية: التركماني والكردي والأرمني والسرياني والعربي، وما فد يوم راح لمبنى المحافظة وگال رشحوني اصير وزير لأن أعرف لغات.!
اتعجب من يكتبون العراقيين “فلان يستاهلها الوزارة لأن يجيد اللغة الأنگليزية”، عساس هذه الإجادة تعادل وتتفوق على إدارة الأزمات، وفن التفاوض، والاقتصاد، والتخطيط الاستراتيجي حتى لو ما يعرف عدد قطع الشطرنج كم قطعة ولا بحياته لاعب مباراة شطرنج وحدة، بس هو استراتيجي لأن عنده (دورة) حاضر بيها، دورة يوم لو ثلاثة أيام لو حتى أسبوعين، شنو من دورة بحيث يخلي واحد وزير، هاي نزيف من أحل الثورة والحزب مو دورة عادية.
فيا جماعة الذين خربطوا في حياة الدنيا، أنتم بعدكم في قالب مال قبل سنوات وسنوات، من كان الطبيب يتعيقل ويكشخ براس أهل المريض ويحچي له جملتين بالانكليزي للممرضة لو الطبيب اللاخ ويسرح الحالة، واهل المريض فاتحين حلگهم هذول شنو من كائنات فضائية يحچون غير لغة والغريب يتفاهمون بيناتهم.
ترى الوكت مر وتعدى.. وحالياً الذكاء الاصطناعي موجود، تلبس السماعة الذكية بيها وتختار اللغة، المقابل شنو يحچي أنت تفهم بلغتك، وتفتح تطبيق من موبايلك تحچي وتختار أي لغة تريد تتحدث بيها مع المقابل، كلامك وصوتك يتحول لا مترجم يمكم يعرف أسراركم ولا شگد تتفق على نسبتك من العقد تحت بند الخمطة الشرعية (العمولة).
فمال تگول فلان يستاهل الوزارة لأن بلبل بالأنگليزي هاي ما تفيد، ترى وداعتك ما راح نحصل منه غير اللون الأصفر في البلبل، وأكيد تعرفون وين اللون الأصفر.
ثانكيو!