لحظة ما…هلو.. مرحبا بعد يومين

Loading

 

نمتار / برهان المفتي

عند الساعة 10:16 بتوقيت غرينيتش، من صباح يوم 18 تشرين الثاني 2026، حقق العلم والهندسة الفضائية إنجازاً للبشرية في رحلة استكشاف سر الكون والفضاء الخارجي، ففي تلك اللحظة تحديداً صار المسبار الفضائي الأمريكي فويجر 1 على بعد يوم ضوئي كامل من الأرض، بمعنى قطع مسافة 25.9 مليار كيلومتر عن الأرض، وهو مستمر في رحلته التي بدأت في 5 من أيلول سنة 1977، بسرعة 61 ألف كيلومتر بالساعة.

دوختكم الأرقام مو؟

هذا إنجاز للناس اللي يؤمنون بعقيدة العلم، لا عقائد الوهم والشعارات الكلامية والفقاعات والخطب المليانة بالرذاذ الفموي – الاسم الإعلامي للتفلة اللي ما أعرف ليش عيب واحد يستخدمها، مثل الاسم المحترم للقندرة هو الحذاء، سواءً قبغلي أو القيطان.

هذه اللحظة فاتتنا بسبب صهاريج النفط وصاعد نازل في الموقف في الخليج، والحوار الميثولوجي في التفضيل بين الأولويات حين يكون الاختيار بين طرفين، مثل لازم نسأل الطفل اللي توه يگول ماما وبابا ذلك السؤال الخالد: ” منو تحب ماما لو بابا؟”.

وهو سؤال ينافس السؤال العراقي الذي يتحدى الزمن والأنظمة: ” هذا وين أحطه”؟

وإذا كنا نعرف جواب السؤال الثاني، وهو جواب تتفق عليه كل العقائد بمختلف طوائفها في العراق، وكل السياسات بمختلف أحزابها ورموزها، فإن الطفل يبقى حائراً في الجواب وهو ينظر في عيني الشخص الذي يسأله دون أن يعرف ما الفرق وليش هذا السؤال.

نرجع لـ(فويجر 1) والأرقام. بهاي المسافة تحتاج إشارة الإرسال من المحطة الأرضية إلى المسبار يومين كاملين بساعاته ودقائقه حتى يجي الرد على الإشارة؛ يوم من الأرض للمسبار، ويوم من المسبار للأرض. ولا تنسى أن المسبار مو واگف بمكانه، بل مستمر بسرعة هائلة.

يعني إذا تگول مرحبا، لا تتوقع الجواب قبل 48 ساعة، حتى لو تظل تعتب وتغني زعلان الأسمر ما يگوللي مرحبا، رغم الخلاف الأيديولوجي: هل الصحيح “ما يگوللي” أو “ما يگللي” باختلاف الجغرافية والمدن والعشائر والبطون والأفخاذ… عبالك بوفيه مو أنساب.

فيا أيها التابعون لعقائد المنابر والخطب والملتصقون بالشعارات، والمتابعون لفيديوهات تعلم كيفية الجلوس في الحمّام بنوعيه، وما حكم أكل بيض الغنم رغم أن الغنم لا يبيض، بس حيا حضوري ومستحى نگول من الغنم نجيب طاري قلاقيله، هل تعرفون قيمة هذه اللحظة في تاريخ البشرية؟

وهسة إذا أجي أسألكم: منو الأول، العقيدة لو العلم؟ راح يكون جوابكم: “شنو فائدة شي يبعد عني مسافة تسعة وعشرين مليار كيلومتر بينما العقيدة يمي وكل يوم أشوفها عالشاشة وتوكتوك وحتى بالشارع، وتحدد لي حتى فنيات غرفة النوم”؟ مو!

النوب هسة حيرتنا كلش چبيرة.. يعني لو فويجر 1 شاف مسبار آخر من غير كوكب.. شلون راح  يگول له مرحبا؟ يدگ هورن لو رماش؟ وإذا شاف أكو كائنات في الفضاء، هذولة شنو ملتهم وعقيدتهم ويجوز الزواج والنكاح وياهم؟ خاصة إذا واحد يتأخر يومين حتى بس يگول “ترى آني أحبچ يا بنت الفضاء”.